Gen 26 | LID | STEP | Ano badeh munyak doh nyamon bwe, i buku none len bwena Abraham mene i ndra loken. Eme Aisik badeh ili hawe kabin badu Pilistin, Abimelek udu Gerar.

Genesis 26

Aisik Hawe Abimelek

1 Ano badeh munyak doh nyamon bwe, i buku none len bwena Abraham mene i ndra loken. Eme Aisik badeh ili hawe kabin badu Pilistin, Abimelek udu Gerar. 2 Eme badeh Laban asahan hawen tiye, “Ou sala Ijip, ou manyah ado munyak jo ndrasehek tam. 3 Ou ado munyak dah ado sese, jo kameh udu hawem ma jo kameh atehei nyosowan i tam. Jo kameh edeu tam hawe edeu ta lundriyem oro ta munyak dah ma jo kameh leheya tandrakan tek handru mene i ta tama Abraham. 4 Jo kameh amwekes lundriyem oro a sola, solo-a ndrau badu kandrah ma edeu munyak mari dah i toro, ma eme iri kon munyak tinan mari kameh ndremenya jo ta kadeu nyosowan ki la-u iri, i buku none jo edeu nyososwan i ta lundriyem oro dah, 5 tasah Abraham badeh anuhun bohok ma hawe anuhun batanau tek.” 6 Eme Aisik badeh manyah udu Gerar udu gwek.

7 Eme oro lau badu kon doh badeh ndremenya Aisik ta udun, eme iy badeh inoh, ma iy anya, “Iy badeh nadu tine.” Iy lomondra badeh i buku doh, Rebeka badeh konen labai eme koro-an iri lau badu kon doh kadai iy, tasah na Rebeka.

8 Aisik udu kon doh luluwen eme badeh, Abimelek kabin badu Pilistin anyolom udu mada kadam i andri badeh iy anyolom Aisik badeh awadei Rebeka. 9 Eme Abimelek luhi Aisik eme ano iy tiye, “Rebeka badeh udum handru! I buku sah ou anya, iy nadu tinem?”

Eme badeh Aisik anya, “Jo lomondra koro-an na iy kameh iri kadai jo.” 10 Ano badeh Abimelek tiye, “Ou amwekes sasah eme taso dah. I buku none ari ndramak katawi udum nane, i dah nane aso ato-ou maha ta aliy, arile kati lakou dah badeh ou.”

11 Eme Abimelek badeh tiye sahou boto-on i tiri lau mari: “Ou are lau amwekes kandriyen ndra-in i ta ndramak dah hawe udun kameh, ou amak.”

12 Ano Aisik badeh tahi baso udu munyak doh, eme uni udu bolo oro baso ari ari nane iy tahi doh, badeh oro ari ari ato-ou rinek rinek sakalawi bwena mene ndra-au, tasah Laban atehei nyosowan i la-un. 13 Iy badeh tan lakou solo-an handru, eme ma lakou tan badeh asahan solo-an eme iy asahan ndramak ari tan lakou solo-an labai. 14 Iy badeh katin haka tan solo-an labai ma iri lau ta lahou tan solo-an ale, eme badeh mada iri Pilistin alikis. 15 Eme iri gwa li mene iri lau ta lahou ta taman Abraham mene a-eh, badeh iri Pilistin ala sokei na ndren.

16 Ano Abimelek anya, “Aisik, ou au ta mada aso; ou badeh tam lakou solo-an labai ma hawe ou ndra boto-on labai.”

17 Eme Aisik suri iy ma iy iu ta kon doh, eme iy ili manyah udu nyamak Gerar. 18 Ano badeh Aisik ili ja ihiy gwa li rayah ja mene taman Abraham udu ndra loken a-eh, mene iri Pilistin sokei, udu kona Abraham imek. Eme iy aloh nyara iri gwa li i buku none taman mene tondrohani.

19 Ano badeh oro lau ta lahou ta Aisik amwekes lahou ado nyamak doh, eme oro takalahei gwa sakaliye bolo ndren. 20 Eme oro lau ta tondrok katin haka badu Gerar badeh andres hawe oro lau ta tondrok katin haka ta Aisik anya, gwa doh toro. Eme iy tondrahani nyara gwa doh Isek, moson “Andres,” tasah oro badeh andres ta aliy hawen. 21 Ano badeh oro ahi ari ja, eme oro andra-i manyuwa aliy le; eme tondrohani badeh Sitnah, moson, “Oro ta andra-i badu bilisiu.” 22 Eme iy ili ja ihi ari ja, eme badeh oro bandra-i ta aliy bwe ai. Eme iy tondrohani nyaran badeh Rehobot, moson “Ndra winiyan ai.” Eme iy tiye, “Laban ndratehei seken ndra winiya to ai, ya to winiyan asahan amwe-es ai.”

23 Ano udu doh badeh iy iu ili loken ili Bersiba. 24 Eme na ben doh badeh Laban asahan hawen tiye, “Jo dah badeh jo Kindrei ta tamam Abraham. Ou sanoh, jo udu hawem; tasah ta i lau ta lahou tek Abraham le, jo kameh atehei nyosowan i tam ma jo kameh edeu kane lundriyem oro kameh a sola.”

25 Eme udu doh badeh Aisik tukumwi bek i loke ta salom ma aloh nyara Laban, ma udu doh le badeh iy tahi asiu balei ma oro lau ta lahou tan ahi gwa li.

26 Ano udu badeh, Abimelek hawe ndramak ta budon tan Ahusat hawe nadramak ta mwena ta bahun tan Pikol badeh oro ado Gerar ame. 27 Eme Aisik ndremenya oro, “Ado badeh mene lomondra ndra-in tado udu tek ma ado sobolei jo eme len, ya ado anya kame dah kabosah?”

28 Eme oro tiye, “Aso badeh anyolom Laban badeh udu hawem eme aso tiye, To badeh kamwekes budon ta sahou randra le kudu ndrokowa to. 29 Aso aseken ou tandrakan, ta ou badeh samwekes bahun same taso, i buku none aso samwekes sawek tam. Aso amwekes mwasin i tam ma ou manyah mwasin le. Ya eme na dah aso ndratanan ndramwe-es ai, Laban badeh atehei nyosowan udu tam.” 30 Eme badeh Aisik mwesekei tine nyamon oro aimon ma a-un gwa. 31 Ano na mandraben badeh uru ma la-uh amwekes sahou randra le ma tandrakan i la-un, ano Aisik batanau oro ma oro kawas tan au ai.

32 Na len doh badeh oro lau ta lahou ta Aisik asahan, ya tiye nyalan ta gwa li mene oro a-eh. Oro anya, “Aso badeh ndrasilahei gwa.” 33 Eme tondrohani nyara gwa li doh, Siba moson “Tandrakan.” I don adeh san kon tinan Bersiba akohok nyaran adeh.

Udu Iso Badu Leheleh

34 Len Iso jaha tan asahan hanoh badeh iy sudi Judit uru Basemat, uru badu Hita. Judit badeh nadu Beri ya Basemat badeh nadu Elon. 35 Uru badeh mwesekei manyah ta Aisik hawe Rebeka bado mwasin bwe.